المساعد الشخصي الرقمي

مشاهدة النسخة كاملة : مكتبة الشاعرة نضال حسن الحاج


kgool
05-09-2012, 10:33 AM
يا عم .. أقيف يا عم ..
من نضال حسن الحاج

يا عم .. أقيف يا عم
أديــني قــطرة دم ..
بي كم تكون الروح ولا العمــر بي كم ..؟
هــّد المرض أعضاي .. ستــّف دواخلي الهم
وانا في ضرا الأموات .. تنقــذنـي قطرة دم
يا خالة نقطة دم ..
تاوقـت بالشـباك .. رد الحزن حزنان
مالك تتاوق بي .. وانا منكسر حيران
شوف نجوى تبكي هديك .. دار تجري للدكان
علي قال بدور يقرا .. وبكى من امس للآن
يا عمو قطرة دم ..
نجوى الغنا الما انقال في حفلة لا اتغنى
نجوى انتظار للشوق في خنجر انســـّن
نجوى امتداد أحلام لو بكرة تتهنى ..
والكانيولات تنشال شان ننقش الحنة
ويا عمو نقطة دم .. واهو عمو ما حن
ويا عمو غني معاي لي شفع الجنة
و اهو عمو ساكت ساي .. نصح البكا وجن
وترا عمو لا خلاك.. لا بيك صدح غنّى
لا قال صباح الخير .. يا نجوى لا صــّن
وبدا سكة الزوار... من تاني ما تنــّى
ويا عمو قطرة دم
واهي نجوى يا مسكين .. وهي حية شبعت موت
اتخيل احساس أم .. رغم الحشا المنكوت
قدر الكلام الجا .. واتحدى ألف سكوت
تدعي في الصلوات .. يا ربي نجوى تموت
يااااااااااااااااااالله نجوى تموت .. بدل العذاب والهم
يا الله قطرة دم .
واهي نجوى شبعت موت.. وكلاها مهرودة
وام نجوى تبكي الدم .. بالحسرة موعودة
هسع بدل أبكيهو .. ونجوى مفقودة
انا كنت لو بعلم .. بنزف دموع الدم
أنا كان بكيتو زمان .. يوم نجوى موجودة
ومحتاجة نقطة دم ..يا خالة قطرة دم

وعلى امتداد مشوار.. لي نجوى والتانين
على يا صحاب شافع .. عارف فروض الدين
كان حافظ القرآن ..من عمرو ست سنين
واسع برا الأهات غالبو النطق حولين
يا ربو قطرة دم ..
حولين اكان عطشان .. بسقوهو بي أنبوب
حولين عصيرو دوا .. وسكر سفوفتو حبوب
حولين ولا سكلب . . لا سمعنا كورك ووب
لا تلب الحيشان .. لا لاعب المحبوب
يا عمو نقطة دم ..
علي كان طموحو كتاب .. كراس وسبورة
وأنا داير أكون دكتور .. شان أختي دكتورة
لا داير أكون مشهور .. لا شاشة لا صورة
بس أنحر السرطان شان روحي منحورة
ومحتاج شوية دم ...
كل البتلقا هناك .. داير يكون دكتور
شايف امنياتو سراب ..إلا العشم منصور
صارع خروج الروح .. نط الخطر والسور
واسع هداك راضي .. وشايل الأسى ومسرور
بشحد شوية دم ..
وانا غايتو شفت الناس الدايرة لقمة عيش
بتصارع الايام .. وتجيبا من ما فيش
شفت الطيور بتعيش .. لو كان معطنا الريش
لكن علي المسكين .. يا ربي ممكن يعيش
وهو راجي قطرة دم ..

kgool
05-09-2012, 10:35 AM
انا بكرهك الشاعرة نضال حسن الحاج

بس بكرهك .. انا بكره اليوم الصنع قلباً
يكورك ويندهك
انا بكره الوطن البلم شرف الغرام المنتهك
من ياتوا باب طليت على ما كنت اصلا بشبهك
انا بكرهك
انا شيلت ريدك فى القليب وسقيته من دم العروق
صنقعت دليت النجم دنقرت كبيت نور وشوق
وعصرت موية الانتظار ختيته فى وجع الحروق
كان النتيجة تبيع هواى واريتو كان سويتلو سوق
انا بكرهك
من وين اجيب ليك الدموع
من وين اصنقر حيل كلام امنيات قلبه الرجوع
من وين اذا هتك الظلام حيل خيلى القالك شموع
لكنى مجبور اطردك واقفل وراك باب الطلوع
انا بكرهك
شديت رحالاتى ومشيت
وقتين هتك حيلك هواى ارتحت فى موجى ورسيت
لا حرك الموج البحرلا صد قلبي ولا قسيت
لكن طلعته خيال عشم ضمخ رؤى الوجع المميت
انا بكرهك
قدر اشتهاي أنا بكرهك
قدر الغرام الكان زمان كابت مساماتي وهواي
قدر غني ما لوثت بيك كريات شراييني ودماي ..
قدر انى غنيتك غناى
من وين دخلت على مدن شاخت من الوجع الاليم
من وين طرقت جدار قلب لقح هوى العشق العقيم
من وين سخت شمسك على كانت سماى مليانه غيم
فتق جراحاتى وامش خلينى فى لهب الجحيم
انا بكرهك
قدر المواسم الشادة خيل الريد عليك .. أنا بكرهك
قدر المصايب الحارسة بوابات مجيك .. انا بكرهك
نفس المسافة وحجم قلبي الكان تملي بيشتهيك بقى بكرهك
اتوكل ارحل منى فوت
حرمان على قلمى الكلام كان غيرك اجتاحو السكوت
خليهو قلبى الاندفن تنسج عليه العنكبوت
او خلى من بعدك اموت
الموت اخير من انى افضل فى رحابك وفى رجاك
انا كنت لو غاب القمر دايما بضوى ظلام دناك
وانا كنت لو غيمك رحل بطلع عشان اسكن سماك
وانا كنت لو بردك نزل بوقد صوابعى لهيب حداك
لكن منو القدر كده
والله لو انا فى محلك بنسج الشمس احترام واهديها
ليك متمدده
بفتح كراريس الكلام واختار حروفى واجرده
وانبش قبور المستحيل كلمات شكر متفرده
لكن خسارة على قلب حباك بلا مايعرفك
انعل ابو القلم العلى دفتر غناك دمه انسفك
انعل ابو الشعر الغشانى وغنى فيك وألفك
ملعون غناى ما امتطيت خيلى وبقيت اتأسفك
بتأسفك وقتين عيونى يسوقن الشوق لانتظارك
لما ليلى يسوق محاسنه وينهزم عندك نهارك
لما ما ابكى انهزامى عشان ابارك انتصارك
لما كوكبى ساب مداروا ورحل عشان يسكن مدارك
كنت مالي زمان ومالك ..؟
لكن وحاتك بكرهك
ندمان على عمراً معاك ضيعتوا فى غفلة زمن
ندمان على دمعاً سكبتو على رضاك بلا تمن
انا كنت بحلم فى وجودك ينكسر خاطر الشجن
لكن رضاى عليك عشم ابليس قصاد جنة عدن
انا بكرهك
كل ما يطول ليلى ويواتيهو العذاب ..انا بكرهك
كل ما القلم يركب مصاعب الدنيا يمشى على الكتاب
انا بكرهك
كل ما الفراق كتل مضامين العشق سدالو باب
انا بكرهك
قدر العيون ما تلبس التوب الزراق تتوضى موية الانتحاب
انا بكرهك
من كل باب انا بكرهك واتوكل ارحل من جواى
غلطان اذا قلبك هداك قال ليك حاتفضل غناى
غلطان اذا عقلك رضخ لى ظن يقول ليك انك هواى
والله مافارق معاى انا كنت ناوى اجملك بس كنت ناوى اجملك
وامسك مضامين اللغات من فيض حروفى اكملك
ترحل على درب العشم بى زاد هواى أحملك
وقتين يخش قلبك جراح اقطع قليبى وادملك
ندمان منو ؟
أنا غايتو ما ندمان عليك ..
أتوكل أرحل براك عيش العذاب الباقى فيك
ولو قلبك اتجرأ رجع .. حقك تلومو على مجيك
عشان انت قليبى مليتو دم
ياخ قلبى انت مليتو دم
ماعاد لو باقى يسيبوا ليك
على كل حال انا بكرهك
عدد الحصى وعدد الرمال
انا بكرهك
عدد الصواب والاحتمال
أنا بكرهك
عدد الحقايق والخيال
أنا بكرهك
عدد الشنا وعدد الجمال
أنا بكرهك
عدد الشعر ما سن سيف الارتجال
أنا بكرهك
عدد الاجابات والسؤال
أنا بكرهك
عدد الممكن والمحال
أنا بكرهك
عدد ما زمان قت ليك تعال
انا بكرهك
مستورة حالى وراك
وفوت يا دابو ليلك همو طال
على كل حال
أنا بكرهك

kgool
05-09-2012, 10:36 AM
ولا تهتم يا يابا

ولا تهتم يا يابا
ولا يهمك كتير يابا
بناكلا كسره بي مويه
وبنحمد ربنا الجابا
وهي زاتا كتيره اصلا جات
قبيلك ما حلمنا با
مدام العيش في ما بِنْجُوع
ودي المقسومه نرضابا
وسُعًاد والله في جنبك
جُرُعْة المويه نهنابا
دحين لا تزعل آيابا
بتتذكّر زمان يابا
بنتقلْقل من البندر
عشان في الحله نَقْضي العيد
ونفرح يا با حد الفرحه
ما تلحق دروبا تصيد
ونتوكل علي الحله
ونسافر في طريقا بعيد
وناصَلْ مهرجان اعياد
أحس الفرحه صوتا يزيد
ونلقى الحله راجيه نجي
سرامْس الشاي
قعاد الضل
فرح حبوبه بالجيه
وبِدْخُلو ناس وبِمْرُقو ناس
كتار بالحيل و ماشويه
وترَضّي منو وتخلي منو
هو دا يقول ليك تعال لا جاي
ودا يقول ليك تعال لا جاي
هدا الويكاب
ودي امْ تَكَشُو
وهدي الكِسره
وهدي الشيه
وهنا الحروم
ونَسْة البن
رمي الودعات
بنية الصرّه والويحيد
واجِبْدي عليكي دي الطيه
وتحتار انت تاكل كيف
قبيل جوك سبعه نفس الحال
وقدّامك كتار آيابا
مُرْضاتُن دروبا طوال
ويبقى الحال هو ياهو الحال
شِجَرة الضل
وريحة الفل
ويبقى الكل أهل طيبين
بِسُتْرو الحاله
كان بقّ الزمن نيران
وتقابة الفكي امْحُمد
ضيوف الخلوه والحيران
وصوتك يابا لامن تقرا
لما ترتل القرآن
وكضاب البقول بحبس دموعو حداك
ملان شيطان
صباح العيد يجو الشفّع
ونحن الدهشه ما خالانا نفهم حاجه حتى الآن
بسوقونا الصلاه ونمرق
نبارك العيد علي الجيران
تصحح انت معلوماتنا
ديلا أهلنا ما جيران
هناك حبوبه أسكت ساي
دي فرحانابنا يايابا ومسويه فوقنا كم دوباي
بجيبو عليها عيديه
وتشيل وتلم
وبستغرب
دا كلو دحين بياكلو منو
أتاري بلمو في صندوق
بجو الحِبّان يخشو الدار
وكل زول خشّ لازم يضوق
وامي الولَّعت صاجا
ومع المعراكه والطايوق
وأولاد عمي من يوم داكا
شالو قروش وفاتو السوق
دا كلو تمام
ولكن ما هو الصندوق
وجاطت فيني حبوبه
ها دي السحّاره
واتعجّبْ كتير يا يابا
فجأه سمعت صوت طمباره
فرحة عيد مبادي بشاره
بالعرس القريب بالحيل
وكل الناس تقوم تتجاري
أو تتبارى
ترقص في غنا الطبماره
يا حبوبه
مالك لابسه ليك سلسل طويل وجِلِدْ
دي يا المبروكه مُفْحَضْتِي
وهناك الجو ولا هو سخانه لا هو برد
تقول حبوبه جدك يا السميحه وِلِدْ
وِلِدْ راجلا بخود الحارّه ساعة الحارّه نارا تلد
أبوك يا بنيّه
واسكت ساي
واهبّش مفحضة حبّوبه
كان ألقالي فيها قروش
أشيل ميتين
واجِر بره
والاقي البيت غزوهو جيوش
يفضُّو الحوش
ويملو الحوش
كأنو تقولو لمو الدنيا
ناس نبته وحضارة كوش
سعف حبوبه كان منكوش
قطن حبوبه كان منفوش
وأقول أفزع مع البنوت
وتحلف أمي بي أيمانا
بتها ما ها زي غيرا
أحنّس أبويا دايره أرد
أرد بالسرقه من أمي
وأسك عربية السيره
وتشيل حبوبه جركانتي السغْيره
تديرا فوق زيرا
وتقول أنا اكتشفت الذره
يبقى وُرودي هو السيره
وأبويا يقول حصاد العيش
ونقعد لي حصاد العيش
ونركب كارّو للحواشه
لازم نمشي من مافيش
ونمشي نشوف حصاد العيش
وكان يوم امتحن في زرعو
واثقه تمام بكون الطيش
وناكل لقمه بي ملحايه
طاااااااااااااااااعمه
وما بِتَطْعَمْ ليييييييش ؟
إذا كانت سواة حبوبه
وكتين ولّعت حطباته
عاستا بره في الراكوبه
كوجنت العجين في الصاج
وقَضّت بي سراع الحوبه
وَدّتا عاشه بت الخير
ولِي منبوذه لِي معيوبه
نفس الحاله ها يابا
باكر يجي الدرت يا بوي
وتملا هدومنا بُتّابه
ومقسم بي يمين الدنيا
كان غرتنا كضابه
قّدُرْ ما ادّتنا أدتنا
ولا في يوم سرحنا با
وباكر يجي الدرت يا بوي
ولا هامّينا عسر الحال
ومهما طال ضلام الليل
صباحو بجيهو مهما طال
ولا خاب العشم يا يابا
لا خيّب إلهنا سؤال
ولا فارق هواك الروح
ولا كسر احتمالي محال
وحاجه ام سلمه لا كلت
ولا صاب اصطبارا زوال
ولا ملّينا عسر الحاله
لسه عشمنا فاتح فال
ولا تهتم يا يابا

kgool
05-09-2012, 10:37 AM
و ندهت ليك

وندهت ليك ...
ها بنيه هوي أختي الطريق اللتق اطرافو الخطر
ها بنيه مالك والدريبات المشلهته بالفتر
هابت خبارك و السفر
وندهت ليك ...
يا مارقه من شهقة زفير اللحظه والنوم السهر
ها بنيه وين عولك إذا كان انتي ما زي البشر
ها بنيه ما سر التقارب بين عيونك و القمر
يا بت مسربله بي عناوين الوتر
لا لاقي لي ليلك صباح لا لاقي لي فجرك اتر
وندهت ليك ... يا بت مغنيه بالصبر
طبالك اتعلم معاك مزيكة الناس الشتر
غنيتي كم ، غنيتي كم مكتول معاك
بي توب معاناة الفقر
ها بنيه من العين دقر
مالك ملتقه من سنين آخر مزاج وآخر عمر
مالك إذا لونك طواف الكعبه طعمك ما لو مر
مالك إذا ضلك مقيل النار علي ضل الجمر
مالك بتشبهي انتماي لي وجعة الناس السمر
وندهت ليك ...
صنيت اضان الدنيا من كتر النبيح
شالك جنونك ختّ في قفصك شيوخ آخر ضريح
ها بنيه مالك و النويح
قلبي المسكين الجريح
خليهو من ضلّ الشقا الاتوقا جمرك ويستريح
غنيته بالعربي الفصيح
وسدتها الحس المريح
وندهت ليها وطن وطن
فتشت ليها مع العروق لا ردّ صوته ولا رطن
فرشت ليها مسام قواي يا ريته ما عرفت سكن
كتلت صغار حضن الأمان والقوه بي شخص الوهن
هابنيه أدخلي في العروق
اتوسدي المطر البكب لا تخافي من ضي البروق
وانعطني في جوف البحر كان وتّرت صوتك حروق
واتوضي من دمع الشروق
وندهت ليك ...
وعرّضت في سوق الجحيم نسياني يا غاليه في غناي
ضُقْتك وأريت ما ضقت لي طعم طعمك
شحتفتي روحي علي الوهم
سليتي سيف قولي البكم
وندهت ليك ...
هابنيه ما كفاياك عذاب
للبيع هتافك و الجرح
للبيع غناي المافرح
للبيع ولا داير شرح
للبيع بنايا على العذاب
أضخم قصر و اجمل صرح
مالك وكت كوركت ليك انبحّ صوتك و ما نطق
مالك مخيطة حسي فيك قبال لده شفتيو انفتق ؟
مالك بتفتحي في جرح طول برا ووجعو اتلتق
مالك تهددي في جرح طول برا ووجعو اتلتق
مالك تهددي في البحر والحوت قصادك بالغرق
شلهتي حال القمره ليه ضيك ولا مدا لنا ايد
حردتي وش أعيادنا ليه طولنا ما شفنالنا عيد
بتحندكي السما بالمطر بتغازلي في الدم الوريد
طيب خبارك والمسيد ؟
طاراتنا قاده جلوده ليه من وين نلاقي جلد جديد؟
يا مهدّده السما بالشتا
وراجيه الشمس تنضم جليد
وندهت ليك ...
أنا ما البفارق سكتك قبال يحدد كيف يجيك
وأنا ما البستف اندهاشو وينتظر لحظة مشيك
وأنا ما البطقطق باب زمن عمدا بفرقو من وشيك
وأنا ما البفلق بالوجع حيطة غنا الحزن السميك
طيب إذا سافرتي ليه ، جاياني في آخر الدرب
ليه ما استفزيتي المطر ينهي الحزازات بالحرب
ليه ما طلبتي من الشمس تعلن شروقه من الغرب
راجياني ارقص في بكاك يبكيني حسك وانطرب
إذن انتي ما بتعرفي لي
سالمي الفجر واديهو وصفي وخلي منك ليهو ضي
مديني إيدك للقدر نتونسك بالليل شوي
أوعاكي خوفك يندمج في حس هتافاتك علي
جوفي البريد عينيك رقد في حافة الجرح النزف
جرتقتي حسك بالغنا وسيرتي صوتك بالأسف
قلبك سكن آخر مضيق في الجوف ودربك ما انعرف
ممزوجه آخر اختزال بين الشرايين والغرف
ما تحنسي القلب البريدك وتغري بي لحظة صفا
أنا ما البقيف كاتف يدينو علي اليقين الانطفا
وأنا ما البسوقو من الأمان لي صوت هبوب العاصفه
وماني البسد اضنيهو واتوسد قفا
يا بت كفا
مليت فراقك والسفر
مليت أضوق طعمك مرار
واعزف أناشيدك شتر
مليت أقيف عندك شجاع وأنا جوه مالين الخدر
مليت أشوفك في السما واتشابى ما أعرف خبر
اتوسدي الغنا والوتر
وأوعى المسافات والسهر
هابت مالك والسفر

kgool
05-09-2012, 10:39 AM
شاهيك باللبن

واحشني شاهيك باللبن
برادك اللونو السواد
وأنا سود أيامي الزمن
قنانتك العطر البفتق من يباس عمري الحزن
وأنا يمه مليت العذاب
كوسيلي في عينيك سكن
واحشني شاهيك باللبن
وأنا هسي بتقريف دموع
ما فضلت دمعة عيون
مربوط لسان حال الكلام
غيرك ولا قادر أكون
عينيك مرفا الإنتظار
راحة المسافر في الظنون
زمنا مكلفت بالوجع
مفتوح علي شارع الجنون
واحشني شاهيك باللبن
وأنا دايره أقول ليك جملتين
حطب العواسه حذاري منو
عماكي ما خلا لي عين
قدد مسام روح تعب
ملا دفتري المن لاكي دين
منعول أبو الما بفقدك ويعرف زمانو بلاكي شين
واحشني شاهيك باللبن
وأنا دايره أقول لك يا الحنينه
زي التكنو هواك معاي
يا يمه هداني التعب
فتق حبال صبري وقواي
يا يمه زي ما قلت ليكي
لقيت قمر ليلي و سماي
نوري ووهج ضلمة حروفي
مصب كلامي و منتهاي
زي التقول ما كان في شي
فكاني في أول طريق
والريد عذاب ما بتمشي
سال الدمع يا يمه رقراق قشقشي
وبعد المتاهات الودار
خليني جنبك أنتشي
وأنا يمه ما خليتلو شي
والله سكنتو الوريد
والله ما طل الصباح
قبال يضخ لي جسمي ريد
والله كل ما يكون حداي
أنا قاعد أحس الدنيا عيد
حزن المسام الشابي
في جوف الحكاوي بكون سعيد
أديني شاهيك باللبن
هسع أقبل أمشي وين
أرجع أقول للناس شنو
وهي الناس كلاما مسيخ وشين
وينو الكتبتو علي دماي
سميتو ضو ليلي الحزين
ولا اللهيب الفي حشاي
اتناسا ويبرد لامتين
ناوليني شاييك باللبن

kgool
05-09-2012, 10:39 AM
موتي جواك اخير

كنت دايره وكت اموت ترثيني انفاسك زفير
وانا كنت دايره الليل يمر ويشرق صباح باكر امير
و تجيني بي ضو الشمس شان يندفق الم الضمير
والقاك محمل اوكسجين ترجاني في النفس الاخير
بس موتي جواك كان اخير
كان اخير من لو اكون ناذراكا للافراح رفيق
كان اخير من وجعتي الكبت وساع السكه ضيق
مش كان اخير من جيتك يملا البحر لون الحريق
وانعل تفاصيل النفس لو حضرتك تعني الشهيق
واحضن ضلامي واقيف براي لكني مابرجاك بريق
واعطش واصد بحرك قفاي وانشاالله ماينبل ريق
شان موتي في جواك اخير
والله لو وروكا كيف انا كنت يوم القاك بكون
كان شلت اسمي مضيت عليو وبصمت انو ده اغلي كون
كنت استلفت من الزمن لحظات وحرشت العيون
تهواني لي حد العمي وتعشقني لي حد الجنون
بس موتي جواك كان اخير
شان يوم الا قيك كنت مابتعرف عيوني النوم يمين
و انا كنت جمبك بس بفكر تاني حا القاك متين
واناكنت شايله متاع سفر احزانو مامعروفه وين
ونهايتو لي آخر ثواني حياتي تتدفق حنين
لكن وحاتك ياقلب مسكين و واطاتك سراب
مسكين وماك عارف رؤي العشق البتعمي العين تساب
مسكين تلاقيك الهموم شقيش تفوت لوحه وكتاب
ترسم نهاياتك مدن تكتب علي جيتك غياب
الله اذا لحظة رحيلك مني تبكي المفردات
الله اذا يوم وجعتك تحزن جميع الكائنات
مابوعدك ارجاك امل وكتين يفوت فيك الفوات
بس بوعدك يوم رجعتك تلقي الحنين الفيني مات
وجنين غرامك قلبو مات
شان موتي جواك كان اخير

kgool
05-09-2012, 10:40 AM
في ذكرى رحيل الفنان الإنسان مصطفى سيد أحمد ال15

رحل خلي الجرح نازف بتاوق للدباره رفيق
رحل والكون مستف ضيق
نشف حلق الوتر آسف عشان صوتو الببل الريق
رجع فتح المواني فريق
وماخليت وراكا طريق

...خبارك يعني يا إنسان
مشيت لارجعه لاهجعه ورقد حلم الوطن ندمان
واتوكيتنا في دربك عصاية حرقه لي فنان
بكب في الضل علي الشارع وينورق في ضرا النسيان

خبارو انحنا أمناك وما اديتنا راحة الليل
خبارك والزمن واقف علي حس الفراغ والحيل
رقدت ولا خبر لاحس ولا اتقفيت هروب الخيل
سرحت معانا ياحاضر ممدد متل ابونا النيل

وماقلينا من نبضك متاع السكه للاطفال
وما دسينا من وشك قفاك لا شفنا سترة حال
وماصدح الوطن طربان ولافضل فرح لافال
ولازال الوجع راقد ممدد بالعرض في البال

خبارك هسي فايت ساي
خمستاشر خمستاشر واعاين لي مروق الناي
خمستاشر وافوت بي جاي تتاوق في الفراغ اعضاي
ولا كان الحضور عندك ولاجيت مره تبقي معاي

خبارك يعني ماحسيت وكت صبح الشعور واجب
قرنت مع الوطن حاجب
وقف ضد الصراخ حاجب

حجب بيني ورؤاك ورؤاي
ومالوليت وراكا جناي
هديل شفع قصايدي هديل يكفتو في الوجع لسه
ورحيلك يعني كان ميلاد وجع تكوين حرف حس
وخمستاشر سنه اتغنيت غناك في البوصله اندس
وضهب كل الوراك غناك كتل حيل الغنا وعس

واشاراتك عشان القاك مقيل في ضرا الافراح
ضريح لي آخر الصلاح
علاج اعمق والذ جراح
ولا عشم الزمن يرتاح
ولارقد الوجع وارتاح
هدا الضل الحلبناو من شمش احزانا عد وراح
هدا الوطن الحلمتبو خير نزف لامن شبع اتراح
هدا الليل المليتو نحيب بكاك لحظة شروقو صباح
سلامات يارهيف الحس
عساك بعد السفر مرتاح.؟

kgool
05-09-2012, 10:42 AM
امرق من الروح


امرق من الروح قبل ماتفضل تنورق فيني لما الروح تفوت
الليل قميص الضلمه للبشتاقو لي الليل والخفوت
امتن من احساس اني أبقي معاك خيوط العنكبوت
شان كت ضل الحر ورقراق البيوت الشاتيه لي شوق الشمش
كنت الدفو البرجاهو شقيش انكمش
كت ردة الفعل التضاد ارهاق خطاي وكتين امش
واخترت تمشي واعيش عشان اتعشي موت
مليت تفاصيل اختلاطك بالدم البجي للمداخل والعروق
خليت شوارع الفرحه تفتح حوشه للبتباكو سوق
صليت وما قبلت وش حرم احتمال جيتك ولا استنيت شروق
شليت مواسم الريده واتيقنت وين تسكن علي كيف ياتو باب تمرق
علي باب يات وريد تشحد تذاكر دخلتك وامر المروق
بي ياتو حق هسع تكفت شفع احساسي الحزاني المنهكين
من وين ادبر ليك خلايا تعوض الفقد الكتل فيني اليقين
كيفن اصبر وحدي الوطن البنيتو جواي والتق ياتو طين
وحم احتضارك في رحم وجعي المسافر من سنين
برد الشتا القاسي البخافو أعدي وين
يات شارع اسع ممكن اتقبلني من غير ماتوقع حاضرتك في خاطري شان فيو استكين
هودا كلو هين بس بطن احزاني يوم تكبر ويشوفه الخوف اقبل امشي وين
وانا مابوريك كيف قبل مااعرفك كفت حس اوجاعي والحزن الدفين
انا كنت كلما الطير بكي وبكي شان سجين
بفرح عشان انافي سجون قلبك مسكره من متين
مابشبهك غير الشقا الجواني او هذا الجنين
مابفهمك زول إلا يوم يشنق مساحات الفضا البراني منك صوت أنين
ماقلت لي قبال ازفك لي مسام قلبي اليتيم انك حنين
أها هسي دي الحنيه وين
وانت امتطيت صهوة جواد احساسي
سافرت وبعاين فيكا طفت مدن جواي
علمت اطفال النبض في قلبي كيف يصطفو
في لحظة مرورك زي تمام الجيش ويستنوك حنين
وانت الصبغت الدم نشاذ لون حضرتك واتأكسدت لحظة دخولك في كريات الدما الوقاده لين
ماك عارف انك مارحمت الهجعه من وجع السهر في اي عين
ماك عارف انك لحظة السفر التمرقك مني بتشل اي جين
لوكنت عارف مابكت بعدك عيون الفرحه دم ابدا ولا اغتصب السكون اوتاري لا مساني شين
لا كنت بتمناك تموت جواي عمر كامل علي راس كل حين
يااامعين
يا ألله يا الخابر دبيب النمله في الليله المضلمه في حجر املس ولا قاسي وتخين
يا ألله يا السويتني من صلصال وطين
يا ألله هسع ممكن استنشق زفير النار وكت يدخل علي رئتيني ذرات اوكسجين؟
يا ألله امرقو من خلايا الجته زي سل السبيبه من العجين
امرق من الروح ماتروح روحة ملامحي مع الوجع
زفوك للداخل زغاريد فرحه للدم النجع
زفوك وماوروني يوم زفوكا لي انك مقيم في كل ضخة دم وكل شهقة نفس
زفوك ويوم دسوك علي حين غفله من احساسي ماشفت المدس
زفوك عشان تشرب نبيذ عصياني في كل البقدسو
فكرتي ويشتاقو مني صدي البحسو براي اذا ما الصوت رجع
زفوك محل الروح تنورق في العضام والجته والشوف والسمع
لكن وكت زفيت معاك القسوه والجفا والنكد
واخترت تعدم زاتي تقصف اي حته بتشبهك عمدا تخت بيناتنا سد
مادام عقب ماشلت ما أملك من الإحساس وصدق الريده والمال والولد
وبقيت علي كيفك محل ما اهف ليك تطراني مرات بالعدد
تب ياهدا الجرح البتكج كلما داويتو لا فات لاهجد
تب ياهدا الزول المسخر روحو للذل والحسد
تب ياهدا القلب المحل يهدو يقول للضوقو الويل
والضلمه نهار وجردو من نبض دقاتو للمحتاج مدد
امروق مروق الضل علي الرماضه لا حس لا خبر
امرق ولا جرحا ينوسر تاني لا خوف لا خطر
امرق ولا مشرط يخش في قلبي لا خيت لا إبر
امرق ولا حس لاخبر

kgool
05-09-2012, 10:44 AM
مرثية الفنان زيدان ابراهيم
بقلم نضال حسن الحاج

(ولاهماك عذابنا) وراك..
ولاك (أوَّل حبيب) ترحل..
تسوق(دنيا المحبة) قفاك
فيا الـ (وسط الزهور) طليت..
وعافية روحنا جاتنا حداك
ويا (حبة فرح) مرقت..
تعزي على البكا الأفَّاك
خباري وها الوطن شاهد..
(بنادي عليك) وبترجاك
تجينا (كنوز محبه) وريد..
(فراش القاش) يغني معاك
(أكون فرحان) وكل الكون..
يصفق لو تطل في يوم
بقول لو (هانت الأيام)..
كفت وش النهار النوم..
(بقيت ظالم) نسيت الناس..
بلاقيك والسماح بالكوم
بقول لك (داوي ناري) تعال..
وشلّ العبره في الحلقوم
تعال تاتي القصيده نقوم
(جميلا ماسألنا) برا..
يقيم في الذات ويتمدد
بنينا معاهو (قصر الشوق)..
أقمنا علي المآسي الحد..
رحل (في الليله ديك) فنان
وراو حيل الأغاني برد..
سكن فوق القلوب مرتاح..
أحبَّك (لو احبك) جد
(قلبك ليه تبدل) يعني..
ما قاوم أذاهو رعاك
(صبح ريدك حياة) الشوف..
وأبصرت الكتابه عماك
خلاس يا (الزاهي لونك) حن..
خلاس ارحم قلب مضناك
بكينا كفاك..



المصدر: منتديات سودان توب

kgool
05-09-2012, 10:48 AM
انا لا ابراهيمك لا روياك
انا لافرعونك لاموساك
لاثعبانك لانى عصاك
انا بس يادابك ساكنه مسامك
وجبرا جاريه مجارى دماك
ومقطع اول
ماغشيتك
اتوقيتا عصات احلام تخل واديك
عفوا ناديتك؟؟؟؟؟؟؟
وشلتك ريحه مطره وقبلى وعلت نارك يوم خشيتك
ودقيت بابى واستاذنت وفتحت الباب بسراع لاقيتك
وعشعش فينى خيالك جوه .
..وكنت الزول الضعف القوه
وكنت انت ادم وكنت انا حواء
سلبت الريد الصادق منى وكان الريد مسكين بتلوه
ودون ما اشعر كنت بحتاجك.؟؟؟؟؟.
كنت بحتاجك لما تعفرت سحب الوجعه ..تسكن خوفى
وكنت بحتاجك لما تطش الكلمه الحلوه تلولى حروفى
وكنت بحتاجك تملاء فراقك فينى وتسكن اخر جوفى
وتبقى القلب النابض انت ورهف احساسى وعافيه شوفى
ومقطع تانى
ولاناديتك
الناداك احساسى وشوقى الشد خيولى وقت لاقيتك
وجيبتك منى جنين مستوطن عصب الفكره وكنت تاتيتك
ويوم فرعون الزمن الظالم فتش عنك انا تاويتك
واوحى خيالى توانس روحى يوم احساسى المرهف جيتك
وكان تابوتك انى اوسد ذاتى مسامك وفجاه ،، رميتك
اتمازجتا الولدالفطره
واتكونت الريد الفكره
وكنت صباح الليله وبكره
وشعاع الزمن الغاتم ونور الحاضر
وزات الزكرى
ومقطع ثالث
ولاغنيتك
الغناك دا الوتر الحاير وانا مابنكر ان هويتك
واستنيتك ..لا وصلتك لا شريتك
انا لادرتك لانى ابيتك
لاطلقتك ولا رديتك
اتيممتك واتوضيتك
لا استنشقتك عنصر ثالث بدى مجال لى اى تاكسد
فوق كريات الريد فى بيتك
انا ادمنتك لما عقاب الزمن استوطن فينى خراب
ورجعتا مشيتك سكه تلملم عقاب الحسره وتخسف بى
لو ما داريتك ؟ وانا داريتك
بين شطئان البال والخاطر
وفى ضل الغيم الماطر
وفى همسات اطفال بتغنى
فاطمه السمحه وحسن الشاطر
ويانى السمحه وياكا الشاطر
لانى زليخه عشان ما اراوضك
.ولاقيك موسى عشان ماتابا
لا شديتك عود وربابه ولادقيت ايقاعك نبتا
ولاحرشتك تمشى الغابه
ولاكلمت البحر يتبخر عشان ماتطلع انت سحابه
ومقطع خامس
انا بالجد بالجد حبيتك
وانا بتوكل ادخل جواك مادام بالانفاس تاويتك
وانا بدخل عصبك عنوه وتدخل جواى ياريتك ..
وينو غناى لو ماغنيتك
وشن غنيت لو ماغنيتك
ويانى عصير زيتونك ونارك
ونور مشكاتك ونورك وزيتك
بس ياريت لو تمسس روحك فكره
انى نسيت اسمى ومانسيتك
انا لا ابراهيمك لا روياك
انا لافرعونك لاموساك
لاثعبانك لانى عصاك
انا بس يادابك ساكنه مسامك
وجبرا جاريه مجارى دماك

أبو عدى
05-09-2012, 10:51 AM
عمل رائع اخى كجول
قمة الروعة و الجمال

kgool
05-09-2012, 10:58 AM
انا عندي فكرة اصبرك

انا عندي فكرة اصبرك امسح غبارات المواجع
بي قصيدي اغبــــركـ عن اي حاجة اخبـــــرك
عن غيمة تبقالا المطر عن غنوة تبقالا الوتر
عن ناس هلك قلبا الخطر طول ضلاما مراعية ليك
راجياك تبالا القمر عن زول كتل قلبو الارق
تبقالاو نوم عز السهر عن فاطمة والسمحة ام عجن
مراقتن حباستن بي صابر الابو والوطن
العزة فوق اصعب تمن
عن كلمة من بت الحسن عني وعن الاسى والشجن
عنك منو الخلاك تكون عاقل وسط وطن الجنون
مين اللي قال كون حنون
تحضن بنيات الغنا وتسقيها من
موية العيون
عني
وعن البكى والنواح
ياااا صابر
الولد الشرب كاسات معتقة بالجراح
الوطن الحضن من حصة الماضي اللي اللي راح
غناني فوق وتر الفرح هلاني يوم غاب الصباح
عزرا اذا ماتت جواي كل المعاني بلا الصبر
صبرا اذا غنيت عليك والدنيا واسوق الفقر
فقرا غناي الباع بكاك والسوق وصل سعرو الجمر
شكرا اذا عاشت جواك حنية الناس السمر
وانا دار اقوللك عن نضال
الشاربة من وطنك قزازات احتمال
كاسات معتقة بالجمال والروعة والاسف المحال
عن حاجة منك وفيك وليك
جاوب علي نفس السؤال
مين علمك او درسك انك تزيد كل ماننقص انتماك
للوجعة فوق الاعتدال
مين صنفك ضمن المساكين المظاليم الغبش
واداك تزاكر ارتحال
وراك تشد خيلك تقوم تسرح تغني مع الخيال
منو الابتداك
يوم انتهت كل البدايات في الغنا
منو زادك اتنين في علاك ضويتلو فوق ليل العنا
ووريتو في عز الوجع ايه يعني حنية وهنا
وغنيتلو فوق زمنا عجيب كل المهم فوقو الانا
وكل زول بكوس لي روحو فيك
وريني القاك وين انا
وقول لي وين القاك جواي
فوق صابر الاخو والصديق
او زاتو طفاي الحريق
او صابر اليوم تنكتم بعد الله فراج زل وضيق
او صابر السكن النيض مرق الشرايين وانكتب
خليتو فوق خشم الكلام فوق زفرة الهوا والشهيق
انا عندي فكرة اقول كفاي وارجع اكوس عنك جواي
او كوس براك انا زاتي ملليت الدروب
فتشني عني وانتماي
قارني بيني بين غناي
اوبيني بين مليون نفر
انا سايقة زاتي وجاية ليك
دلليني من تعب السفر
ناديني منك ياولد حوا المعتقة بالمطر
حوا البتسكن فوق غناك
ناديها من وطن الخطر
انا عندي فكرة اكلمك بي فاطنة والله يقدرك
وانا عندي فكرة اصبرك

kgool
05-10-2012, 11:41 AM
يوم غير المطر اتجاهو نضال حسن الحاج (http://www.youtube.com/watch?v=y5RU8PO-I2I)

عبد الرحمن السامر
09-11-2012, 09:14 PM
مشكور اخى كجول
على التوثيق للشاعرة الكبيرة
رد الله غيبتك لتمتعنا بابداعك..

ابو منية
10-14-2012, 12:01 PM
عايشة على القديم
ولا جديد لديها .
اتمنى ارى جديدها

عبد الرحمن السامر
10-17-2012, 09:28 PM
جديدها الزواج
لا الشعر
مشكور اخى ابومنية اسال الاخ كجول..

حبيب النوارس
10-17-2012, 10:51 PM
مشكور اخي الرائع كجول
مجهود مقدر
ماقصرت
هي هكذا نضال
عظيمة بعطائعا
مشكور مرة أخرى
كل الود
،،،

kgool
10-18-2012, 08:04 AM
شكرا لكم جزيلا

وسوف نجمع لهذه الشاعرة الجديد باذن الله تعالى

لكم منى شديد الاحترام والتقدير

مزمل الشكري
09-17-2013, 07:28 PM
تسلم علي المجهود الجميل ده

مزمل الشكري
10-18-2013, 05:17 PM
نضال حسن الحاج شاعره متميزه جدا

عبد الرحمن السامر
10-18-2013, 09:43 PM
وين نضال؟؟
تزوجت صلاح ادريس ونسيت الشعر
ووين صلاح ادريس لا اثر له ولا خبر..